( या कवितेचा विडियो ही दिला आहे. कवितेला पूरक अशी रांगोऴी ही आहे. विडियो बघून कॉमेंट लिहायला विसरू नका.)
*देऊ धैर्याने लढा*
उघडे फिरते पोर भिकारी
पुतळ्यांना मात्र कपडे भारी
तरी तांड्यावरच्या खोपटातली
माय सांगे आपल्या लेकराला
देऊ धैर्याने लढा.......
नेते कितीही येती-जाती
समस्यांना नसते गिनती
श्रीमंत अधिक श्रीमंत होती
तरी सामान्य म्हणे कुटुंबाला
देऊ धैर्याने लढा.......
रोज एक स्त्री बळी पडते
स्व अस्तित्वासाठी धडपडते
सगळेच पुरुष सारखे नसतात
आई धीर देई लेकीला
देऊ धैर्याने लढा.......
पोर करपते स्पर्धेमधे
भीती सदा गुणवत्तेची
तरी जीव तुझा अनमोल
बाप समजावे पोराला
देऊ धैर्याने लढा.......
उंच भरारी घेण्याआधी
कळी कोमेजते पोटातच
लचके तोडण्या तयार कोल्हे
तरी भाऊ समजावे बहिणीला
देऊ धैर्याने लढा.......
मोडणाऱ्या संसाराला
सोबत एकमेकांची सदा सावरते
पांघरता तुज ऊन पाऊस ही थिटा पडे
पत्नी बोले पतीला
देऊ धैर्याने लढा.......
सुळसुळाट सारा भोंदूंचा
अन् बाजार झाला श्रद्धेचा
तरी संकट येता मदत मिळे
माणूस सांगे माणुसकीला
देऊ धैर्याने लढा.......
निर्माल्ये सारी नदीत जाती
प्रदूषणाने ग्रासले पाण्याला
तरी गाळ उपसणारे हात बघून
सरिता बोले सागराला
देऊ धैर्याने लढा.......
चोच वासते चिमण्या जिवांची
फुका पाण्याचे लोट वाहती
बघून परसातले दाणा पाणी
चिमणी बोले चिमण्याला
देऊ धैर्याने लढा.......
जंगले सारी नष्ट झाली
प्राणवायू पुरे न श्वासाला
तरी रोप उगवते फोडून खडकाला
धरणी बोले गगनाला
देऊ धैर्याने लढा.......
दुष्काळ जरी वाढला
निसर्ग जरी कोपला
फुलवू हिरवा गालीचा
बळीराजा बोले काळ्या मातीला
देऊ धैर्याने लढा........
भ्रष्टाचार बळावला
बेरोजगारी वाढली
तरी मेहनत करणारे हात बघून
सत्य सांगे गरिबीला
देऊ धैर्याने लढा.......
©️ अंजली मीनानाथ धस्के
Superb....
ReplyDelete